Act 25 | WSK | STEP | Festus ali sor bituokko Caesarea daigam baga, tom ilagala suwan namaram asele nu barasam Jerusalem namaram.

Acts 25

Paul balam Caesar noko den arigokko mam

1 Festus ali sor bituokko Caesarea daigam baga, tom ilagala suwan namaram asele nu barasam Jerusalem namaram. 2 Se umu te priest bibiya se Juda supuling alo nu kote taiman ale den atumu Paul tuikasan. 3 Ale Festus isaru diruwukasan, “Nanga sangaru ale Paul bitar se Jerusalem tairukko,” makasan. Bare nuna lage te yumumon baga Paul taiwuruk se momonko den nungurman. 4 Bare Festus nunga den koma iwita balam, “Paul mu Caesarea sor te talipara ningi bagoso. Se ani agata umu te namirikko tom pingi aram. 5 Se nina nengeta ninga supuling sang ani agarak Caesarea nama aratomon asele nu memek bo beteram agi mu, umu te den te atumumonko.”

6 Festus udagi tom 8 nama 10 iwitata arungak baga asele nu barasam Caesarea peleram namaram. Ale ukiram se nu den ariga ko kawam ningi nama daigam, ale Paul tairukko den beteram. 7 Se Paul tai aratam se Juda alo Jerusalem beteman taiman bagaman mu tai taluru guruguman ale den memek ikup ikup atumu tuikasan. Bare den mu ko duap bo kariimet te ikimon ale “mu nunguningta balsan” mamonko mu mena.

8 Se Paul den koma iwita balam: “Ani Juda nunga munan te memek bo me beterem, temple ningi memek bo me beterem, ale Caesar kumik te mu betela mena tala.”

9 Bare Festus Juda alo nongomang kulukurukaso ale Paul maonam, “Ni Jerusalem namar ale ani amakete sanamir se ka den aringinakko mu terong i?”

10 Bare Paul meram ale balam, “Ani aitakta Caesar ko den ariga kuwim te diram sanamiwasam. Se imitang te la aninga den arikko mu asele. Ani Juda nungumik te memek bo me beterem mu ni keta ninguru ikiwasam. 11 E ani memek bo ko koma aninga momon se kuerikko mu iwita bitirik, mu ani balik me aga momon se kuerikko ma me balikko, mu am kuerikkowo. Bare den nuna atumu ani angimik te beteman mu den nunguning mena. Buta se kari bo ani nuna nuguting te aga bitirukko me terong. Ani Caesar arusam, nu aninga den arigokko!”

12 Se Festus ko kari supuling arungu munakaram asele balam, “Ni Caesar aurem, mu eng Caesar kote namarko!”

Festus Paul ko, King Agrippa isuam

13 Tom saki namaram se King Agrippa ko nuwus Bernice ilak Caesarea wonong te Festus amilmil tumonko tai arataman. 14 Nuna umu te tom maiya nuam bagakasan, se Festus Paul ko dugu duap King Agrippa manarukaso. Ale balam, “Kari bo imi te talipara ningi bagoso mu Felix beteram se baga lagoso. 15 Ani Jerusalem namerem mu Juda nunga priest bibiya se supuling alo den te atumuman, ale ani nu memek te bitirikko aga isarman. 16 Bare ani nunga manem, ana Rome nanga munan bo kari yam memek te betera ko mu me aniso. Mu nu kumik den ago mu nu kari den te atumuwasan mu arungu sanamuruk, se ana kuring tunak, se nononga den koma baluk se ikinak, mu asele.

17 “Se nuna ani agarak imi te taiman mu kam bo ago me namaram, mu ani anirem ukiram se den ariga kuwim te nama daigem, ale kari mu ilak agate taimonko balem. 18 Se kari ari nu den te atumuwaman mu barasaman ale balukasan. Se ani nuna kilek memek saki ko den nu kumik te balmonko i makasam, bare mena. 19 Nuna nongota nunga munan ko, se kari nup Jesus kueram bare Paul balso mu am marak bagoso maso, umutang la ko den balukasan. 20 Ani den mu ko duap ikiek ale aguwaya nungekko wore ko ikia aga moakaso. Se ko ani Paul isem, nu Jerusalem namuruk asele umu te ani ko den arigekko agi wore ko isem. 21 Bare Paul balam, nu am talipara ningi baguruk se udagi te Caesar kota noko den arigokko mam. Buta se ani balem, nu yam talipara ningi bitaru se bagomon se ani agata tom kuring bo nu te Caesar kote namurukko arigek asele.”

22 Se Agrippa Festus maonam, “Ani agata kari mu kuring te den ikiekko,” mam.

Se Festus balam, “Ukirok se asele kuring ikiko,” mam.

23 Ukiram se Agrippa Bernice ilak bala beteman, ale kager kari nunga supuling bibiya, se wonong mu ko kari bibiya arungu den ariga ko kuwim te nama kasu naguman. Se Festus balam se Paul ilak utu naguman. 24 Asele balam, “King Agrippa, se nina suen la imi te bagasan, mu kari imi arigalko! Juda kariimet suen la, Jerusalem sor te, se imi te, kari imi ko aninga isaru gurugumukasan, ale biyala balukasan, ‘Kari imi marak baguruk bore ko, am monak se kuerukko,’ makasan. 25 Bare ani mel bo nu te monak se kuerukko mu beteram se me arigem. Bare nu Caesar noko den arigokko balam ale auram, se ani nu Rome bitirik se namurukko ikiwasam.

26 “Bare ani noko dugu duap bo diram arigek ale bataguru kari biya Caesar tuek se arigokko wore mena. Buta se ani balem se ilak tai nina, se nanga kari biya Agrippa buta nemekete beteman se sanamiwoso. Se ko den ninguru iki se ani den sang Caesar bataguru tuekko mu ago ko ikiekko. 27 Mu awuk, ani kari bo yam Rome bitirik se namuruk, se noko dugu duap te den ningi beteman mu me ago balik, mu ani ikisam uwuta mu me terong.”